Psa 46 | MEU | STEP | Dirava na eda roho-mauri gabuna, bona eda goada, ikahada namo-hereana dika negadia ai.

Psalms 46

1 Dirava na eda roho-mauri gabuna, bona eda goada,
ikahada namo-hereana dika negadia ai.
2 Una dainai ita na basita gari,
ena be tanobada baine idau,
ena be ororo bae marere-marere davara bogaraginai,
3 ena be davara ranudia bae regerege bona bae gwaragwara,
ena be ororo bae heude-heude una regerege dainai,
to ita na basita gari. (Selah)
4 Sinavai ta ena aru parara ese Dirava ena hanua vada e hamoalea,
Herea Mikamika ena noho gabuna helaḡana bunai.
5 Dirava na ia bogaraginai, ia na basine marere;
Dirava ese ia baine kahaia, daba matana ai.
6 Tanobada besedia e heloḡo-heloḡomu,
basileia idau-idau e raivaraivamu;
ia gadona e gwau isimu,
bena tanobada e vevemu.
7 Iehova Sabaota na ita ida;
Iakob ena Dirava na eda kohoro. (Selah)
8 Aoma, Iehova ena ḡaukara a itaia;
hahedika karadia ia ese tanobada ai vada e kara.
9 Tuari ia ese e hadokodiamu ela bona tanobada dokona,
peva ia ese e bituamu,
io ia ese e hakwaiduamu,
kariota ia ese lahi ai e douamu.
10 Eremui, ba diba, lau na Dirava;
bese idau-idau bogaragidiai e imodaigumu,
tanobada ai e heatolaigumu.
11 Iehova Sabaota na ita ida;
Iakob ena Dirava na eda kohoro. (Selah)